நீங்கள் தேடியது "வேலை வாங்கி தருவதாக மோசடி"

அரூர்:

தருமபுரி மாவட்டம், அரூரை அடுத்த கே.வேட்ரப்பட்டி கிராமத்தை சேர்ந்தவர் நெடுங்கிள்ளி (வயது64). இவர் தமிழ்நாடு மின்சார வாரியத்தில் போர்மேனாக பணியாற்றி ஓய்வு பெற்றவர். இவரது மகன் ஏங்கல்ஸ். இவர் பி.எஸ்.சி., பி.எட். படித்து உள்ளார்.

இவருக்கு மின்சாரவாரியத்தில் வேலை வாங்கி தருவதாக அனுமன்தீர்த்தம் உதவி மின்பொறியாளர் அலுவலகத்தில் கணக்கீட்டாளராக பணியாற்றும் அரூர் சந்திரபுரம் வேடியப்பன்கோவில் தெருவை சேர்ந்த குணசேகரன் ஆசை வார்த்தை கூறினார். இதற்காக ரூ.6 லட்சம் வேண்டும் என்றும் அவர் கேட்டார். முதல் கட்டமாக ரூ.4 லட்சத்தை குணசேகரனிடம் கொடுத்தார். மீதி 2 லட்சத்தை வேலைக்கான உத்தரவு வந்த உடன் தர வேண்டும் என்று கூறினார். ஆனால் அவர் வேலை வாங்கி தரவில்லை பணத்தையும் திருப்பி தரவில்லை.

இது குறித்து நெடுங்கிள்ளி மாவட்ட போலீஸ் சூப்பிரண்டு அலுவலகத்தில் புகார் மனு கொடுத்தார். அந்த மனு மீது விசாரணை நடத்தி நடவடிக்கை எடுக்கும்படி மாவட்ட போலீஸ் சூப்பிரண்டு உத்தரவிட்டார்.

அவரது உத்தரவின் பேரில் அரூர் இன்ஸ்பெக்டர் பவுலேஸ் மேற்பார்வையில் சப்-இன்ஸ்பெக்டர் குணசேகரன் விசாரணை நடத்தி வேலை வாங்கி தருவதாக ஏமாற்றிய மின்சார வாரிய கணக்கீட்டாளர் குணசேகரனை கைது செய்தார். அவருடன் சேர்ந்து மோசடியில் ஈடுபட்ட மேலும் ஒருவரை போலீசார் தேடி வருகின்றனர்.

விழுப்புரம்:

கடலூர் மாவட்டம் சிதம்பரம் அருகே உள்ள சிலுவைபுரம் பகுதியை சேர்ந்தவர் ஷோபியா (வயது 32) பி.ஏ. பட்டதாரி. இவர் இந்திய உணவு கழகத்தில் கட்டுப்பாட்டு அதிகாரியாக பணியாற்றி வருவதாக கூறினார். பலரிடம் அரசு வேலை வாங்கி தருவதாக சிதம்பரம் மற்றும் சுற்றியுள்ள பகுதிகளை சேர்ந்த 74 பேரிடம் ரூ. 3 கோடிக்கு மேல் வசூலித்தார். ஆனால் அவர்களுக்கு வேலை வாங்கி கொடுக்காமல் மோசடியில் ஈடுபட்டார். இவருக்கு உடந்தையாக இவரது தாய் ஆரோக்கியசெல்வி மற்றும் கடலூரில் கம்யூட்டர் சென்டர் நடத்தி வரும் ரவிச்சந்திரன் ஆகியோர் இருந்தனர்.

இது குறித்து சிதம்பரம் தாலுகா போலீசில் புகார் செய்யப்பட்டது. போலீசார் வழக்குப்பதிவு செய்து கடலூர் செம்மண்டலத்தில் தலைமறைவாக இருந்த ஷோபியாவை கைது செய்தனர். மேலும் ஆரோக்கியசெல்வி, ரவிச்சந்திரனும் கைது செய்யப்பட்டு கடலூர் சிறையில் அடைக்கப்பட்டனர். இந்த நிலையில் விழுப்புரம் மாவட்ட குற்றப்பிரிவு போலீசில் ஷோபியா மீது சின்னசேலம் அருகே உள்ள அக்கராயப்பாளையத்தை சேர்ந்த லூர்துமேரி (வயது 50) என்பவர் ஒரு புகார் மனு அளித்தார்.

அதில் எனது மகள், உறவினர் மற்றும் நண்பர் குடும்பத்தை சேர்ந்தவர்கள் என 4 பேருக்கு அரசு வேலை வாங்கி தருவதாக கூறி எங்களிடம் ரூ.25 லட்சத்தை ஷோபியா வாங்கினார். அதற்கு போலி உத்தரவு நகலை கொடுத்தார். அப்போது நாங்கள் பணம் கொடுத்து ஏமாந்தது தெரியவந்தது. நாங்கள் கொடுத்த பணத்தை ஷோபியாவிடம் கேட்டபோது எங்களை ரவுடிகளை வைத்து மிரட்டினார். ஷோபியாவிடம் இருந்து நாங்கள் கொடுத்த பணத்தை மீட்டு அவர் மீது நடவடிக்கை எடுக்க வேண்டும். 

இவ்வாறு அந்த மனுவில் கூறப்பட்டிருந்தது.

அதன்பேரில் ஷோபியா மீது நம்பிக்கை மோசடி உள்ளிட்ட 5 பிரிவுகளின் கீழ் விழுப்புரம் குற்றப்பிரிவு போலீசார் வழக்குப்பதிவு செய்தனர். தொடர்ந்து ஷோபியா மீது பல்வேறு புகார்கள் குவிந்த வண்ணம் உள்ளன.

இதனால் விழுப்புரம் மாவட்டத்தில் வேறு யாரிடமாவது இது போன்று அரசு வேலை வாங்கி தருவதாக கூறி ஷோபியா பண மோசடியில் ஈடுபட்டாரா என்பதை கண்டறிய அவரை காவலில் எடுத்து விசாரிக்க போலீசார் முடிவு செய்து உள்ளனர். விசாரணையில் பல்வேறு தகவல்கள் கிடைக்கும் என எதிர்பார்க்கப்படுகிறது. 

தேனி:

தேனி மாவட்டம் தேவாரம் மீனாட்சிபுரத்தைச் சேர்ந்த அழகுராஜ் மகன் அருண்குமார். இவருக்கு அரசு கால்நடைத்துறையில் வேலை வாங்கித் தருவதாக சந்தைப்பேட்டை தெருவைச் சேர்ந்த முருகன் என்பவர் கூறியுள்ளார். அதற்காக அழகுராஜிடம் கடந்த 4 ஆண்டுகளுக்கு முன்பு ரூ.8½ லட்சம் பணம் வாங்கினார். ஆனால் சொன்னபடி வேலை வாங்கித்தரவில்லை.

தன்னை ஏமாற்றுவதை அறிந்த அழகுராஜா இது குறித்து மதுரை ஐகோர்ட்டு கிளையில் வழக்கு தொடுத்தார். வழக்கை விசாரித்த நீதிமன்றம் தேவாரம் போலீசாருக்கு விசாரணை நடத்த உத்தரவிட்டது. அதன்படி பணம் மோசடியில் ஈடுபட்ட முருகன் மீது தேவாரம் போலீசார் வழக்குபதிவு செய்து விசாரணை நடத்தி வருகின்றனர்.

இதேபோல் போடி கிருஷ்ணாநகரைச் சேர்ந்த காந்திராஜன் மனைவி சித்ரா. கணவர் இறந்து விட்டதால் தனது குழந்தைகளுடன் தனியாக வசித்து வந்தார். இவரிடம் போடி பாலாஜி நகரைச் சேர்ந்த கபில்ராஜா. கடந்த வருடம் அறிமுகமானார். தனக்கு மூணாறில் 54 ஏக்கரில் ஏலத் தோட்டம் இருப்பதாகவும், அல்புகாரியில் ரிசார்ட் இருப்பதாகவும் கூறினார்.

மேலும் மாட்டுப்பட்டி செல்லும் பாதையில் புதிய ரிசார்ட் கட்டி வருவதாகவும் அதற்காக வங்கியில் கேட்ட கடன் தொகை தாமதம் ஆவதால் ரூ.30 லட்சம் பணம் தருமாறு கேட்டுள்ளார்.

அதற்கு ஈடாக அந்த ரிசார்ட்டில் சித்ராவையும் பங்குதாரராக சேர்த்துக் கொள்வதாக உறுதிமொழி பத்திரம் அளித்தார். அதன்படி கடந்த வருடம் ஜூலை மாதம் ரூ.30 லட்சம் பணத்தை சித்ரா கொடுத்தார். ஆனால் சொன்னபடி ரிசார்ட்டில் சித்ராவை பங்குதாரராக சேர்க்கவில்லை. தான் கொடுத்த பணத்தை சித்ரா கேட்ட போது அவர் மீது கந்து வட்டி புகார் கொடுத்து விடுவதாக கபில்ராஜா மிரட்டியுள்ளார். இது குறித்து மாவட்ட போலீஸ் சூப்பிரண்டு பாஸ்கரனிடம் சித்ரா புகார் அளித்தார்.

எஸ்.பி. உத்தரவின் பேரில் மாவட்ட குற்றப்பிரிவு போலீசார் கபில்ராஜா மீது வழக்குபதிவு செய்து விசாரணை நடத்தி வருகின்றனர்.